19 ноябрьдә ТР ФА Ш.Мәрҗани исемендәге Тарих институтының Милли мәгариф тарихы һәм теориясе үзәгендә булып узган түгәрәк өстәлдә ХХ гасырның беренче чиреге татар зыялыларының эшчәнлеге һәм язмышлары турында сүз алып барылды. Чыгыш ясаучылар татар халкының күренекле улы, математик, дәреслекләр авторы, Татарстан мәгариф халык комиссариаты каршында оештырылган Академүзәкнең беренче рәисе, танылган җәмәгать эшлеклесе һәм шәхес культы корбаны Гаяз Гыйсаметдин улы Максудовның тормыш юлы һәм эшчәнлеге, татар милләте алдындагы казанышлары, Академик үзәкнең эшчәнлеге, анда хезмәт куйган татарлар турында сөйләштеләр. Чарада катнашучылар шулай ук шул чорның башка зыялылары – Сәетгәрәй Әхмәров Якуб Богданович, Нәсыйх Мөхетдинов, Хәлил Әбүлхан, Габдрахман Ильяси, Шәйхгаттар Иманаев, Шакир Мөхәммәдъяров, Габдулла Биги, Габдулла Гыйсмәти, Хәбибрахман Зәбири, Хәлим Искәндәров, Хәбиб Зәйни, һ.б.ларның эшчәнлекләре һәм аянычлы язмышлары, аларның татар халкы тарихында тоткан урыннары турында тәфсилле сөйләделәр. Фикер алышуларда Марат Гибатдинов, Ләлә Мортазина, Шамил Садыйков, Людмила Бушуева, Эльмира Салахова һәм Тәэминә Биктимировалар катнашты.