2021 елның 21 декабрендә ТР ФАнең Ш.Мәрҗани исем. Тарих институтының Милли мәгариф тарихы һәм теориясе үзәгендә узган “Татар мәгърифәтче хатын-кызларының эшчәнлеге һәм әдәби-педагогик мирасы” дип исемләнгән түгәрәк өстәл эшендә Институтның Милли мәгариф тарихы һәм теориясе үзәге хезмәткәрләреннән тыш, Диннәр тарихы һәм иҗтимагый фикер, ТР халыкларының тарихи-мәдәни мирасы, Этнологик тикшеренүләр бүлекләре галимнәре, татар хатын-кыз мәгарифен, төбәк тарихын өйрәнүчеләр катнашты.

Чыгыш ясаучылар – Гибатдинов М.М., Мортазина Л.Р., Зиннәтуллина А.Ә., Садыйков Ш.Ф., Сәлахова Э.К., Гайнанова М.Р., Дәүләтшина Л.Ш.,  Биктимирова Т.Ә., Даутова Э. ХХ гасыр башы татар мәгарифе һәм әдәбияты үсешенә өлеш керткән мәгърифәтче-әдибәләр, хатын-кыз педагогларның эшчәнлеген һәм тормыш юлын, язма мирасларын өйрәнү һәм заман укучысына җиткерү һ.б. мәсьәләләргә тукталдылар. Тарихи чыганак һәм заманча уку-укыту әсбабы буларак Галимәтелбәнат Биктимерия, Фәхрелбәнат Сөләймания хезмәтләре, Кавказда татар хатын-кыз мәгърифәтчеләренең эшчәнлеге, Акъегет мәдрәсәсе мөгаллимәләре, Маһруй Барудия, Рабия Арат турындагы яңа мәгълүматлар катнашучыларда зур кызыксыну уятты.

*  *  *

Әлеге чарада түбәндәге юнәлешләр буенча фикер алышулар булачак:

– Хатын-кыз педагоглар, мәгърифәтчеләр һәм аларның татар педагогик фикере үсеше тарихында тоткан урыннары;

– 19 гасыр ахыры – 20 гасыр башы татар хатын-кыз мәгърифәтчеләрнең әдәби-педагогик мирасын өйрәнүнең торышы;

– Күренекле хатын-кыз мәгърифәтчеләрнең тормышын һәм эшчәнлеген өйрәнү, иҗади мирасларын укучыларга тәкъдим итү мәсьәләсе;

– Моңарчы аз билгеле булган педагогларның хезмәтләрен өйрәнү, заман укучысына җиткерү;

– Педагогик хезмәтләрне рус теленә тәрҗемә итү мәсьәләсе.

Үткәрү урыны: Казан шәһәре, Батурин урамы, 7а йорт, 221 бүлмә

Башлана: сәгать 11дә.